పరీక్షల్లో మెరుగైన ఫలితం కోసం...

ఎంబీఏలో ఏ స్పెషలైజేషన్ మేలు?

బీటెక్‌ (మెకానికల్‌ ఇంజినీరింగ్‌) చదువుతున్నాను. తర్వాత ఎంబీఏ చేయాలనుకుంటున్నాను. ఏ స్పెషలైజేషన్లతో ఎంబీఏ చేస్తే ప్రయోజనం ఉంటుంది?
- జి. ప్రసన్నకుమార్‌, విశాఖపట్నం

బీటెక్‌ పూర్తయ్యాక ఎంబీఏ చేయడం ద్వారా మీ ఉద్యోగ అవకాశాలకు బాగా మెరుగుపరచుకోవచ్చు. సాంకేతిక, నిర్వహణ సామర్థ్యాల ద్వారా మంచి కెరియర్‌ను అందుకోవచ్చు. ఎంబీఏలో అనేక ఫంక్షనల్‌ స్పెషలైజేషన్లు, సెక్టోరల్‌ స్పెషలైజేషన్లు అందుబాటులో ఉన్నాయి. వీటిలో దేన్ని ఎంచుకోవాలనే విషయంలో స్పష్టత అవసరం. మీ ఆసక్తి, అభిరుచిని బట్టి ఫైనాన్స్‌, మార్కెటింగ్‌, హ్యూమన్‌ రిసోర్సెస్‌, ఆపరేషన్స్‌ మేనేజ్‌మెంట్‌, తదితర ఫంక్షనల్‌ స్పెషలైజేషన్‌లను ఎంచుకోవచ్చు. కొన్ని ప్రత్యేక రంగాలపై ఆసక్తి ఉంటే సెక్టోరల్‌ స్పెషలైజేషన్లను తీసుకోవచ్చు. టెక్నాలజీ మేనేజ్‌మెంట్‌, ఫార్మాస్యూటికల్‌ మేనేజ్‌మెంట్‌, హెల్త్‌కేర్‌ మేనేజ్‌మెంట్‌, ఇన్‌ఫ్రాస్ట్రక్చర్‌ మేనేజ్‌మెంట్‌, మీడియా మేనేజ్‌మెంట్‌, మొదలైనవాటికి మంచి డిమాండ్‌ ఉంది. ఇవిగాక ఎఫ్‌ఎంసీజీ, రిటైల్‌, ఫారిన్‌ ట్రేడ్‌, ఐటీఈఎస్‌, తదితర రంగాలకు సంబంధించిన స్పెషలైజేషన్లు కూడా ఎంచుకోవచ్చు.

మంచి ప్రమాణాలు పాటించే బిజినెస్‌ స్కూల్‌లో మీకు నచ్చిన ఏ స్పెషలైజేషన్‌లో ఎంబీఏ చేసినా ప్రయోజనం ఉంటుంది. కొన్ని సంస్థల్లో డ్యుయల్‌ స్పెషలైజేషన్‌ చేసే అవకాశం కూడా ఉంటుంది. ఈ కోర్సుల ద్వారా రెండు రంగాలకు సంబంధించిన మేనేజ్‌మెంట్‌ అంశాల్లో నైపుణ్యం సాధించవచ్చు.

* నేను ప్రముఖ కార్పొరేట్‌ సంస్థలో బీబీఏ (ఫైనాన్స్‌) చదువుతున్నాను. బీబీఏ తర్వాత ఎంబీఏ చేయడం మంచిదేనా? బీబీఏతో ఎలాంటి అవకాశాలు ఉంటాయి?
- కె. మధు, హైదరాబాద్‌

ఫైనాన్స్‌ స్పెషలైజేషన్‌తో బీబీఏ చేయడం మంచి ఆలోచన. బీబీఏ అభ్యర్థులకు ఆర్గనైజేషనల్‌ స్కిల్స్‌, మేనేజ్‌మెంట్‌ భావనలు, వ్యాపార క్రమశిక్షణ అంశాల్లో నైపుణ్యం ఉంటుంది. నిర్ణయాలు తీసుకోవడం, వ్యాపార ప్రణాళిక, ఆచరణాత్మక అంశాల్లో కూడా సామర్థ్యం ఉంటుంది. అందువల్ల సరైన సంస్థలో బీబీఏ చేసిన అభ్యర్థులకు ప్రస్తుతం కంపెనీలు మంచి అవకాశాలను కల్పిస్తున్నాయి.

బీబీఏ తర్వాత ఎంబీఏ చేయాలా, వద్దా అనేది అనేక అంశాల మీద ఆధారపడి ఉంటుంది. వాటిలో ముఖ్యమైనవి... మీ ఆప్టిట్యూడ్‌, కెరియర్‌ లక్ష్యాలు, ఆర్థిక అవసరాలు. బీబీఏ డిగ్రీతో ఏదైనా కంపెనీలు మేనేజ్‌మెంట్‌ ట్రెయినీ లేదా ఎగ్జిక్యూటివ్‌ ట్రెయినీగా ఉద్యోగం సాధించవచ్చు. బ్యాంకింగ్‌, ఫైనాన్స్‌, కన్సల్టెన్సీ, ఎఫ్‌ఎంసీజీ, ఐటీ, అడ్వర్టయిజింగ్‌, తదితర రంగాల్లోని కంపెనీలు బీబీఏ అభ్యర్థులకు మంచి వేతనాలతో ఉద్యోగ అవకాశం కల్పిస్తున్నాయి. కనీస వేతనం రూ.1.5 లక్షల వరకు ఉంటుంది. బీబీఏ పూర్తయ్యాక మంచి ఉద్యోగం రావాలంటే ఇప్పటినుంచే సాఫ్ట్‌స్కిల్స్‌, కమ్యూనికేషన్‌ అంశాలపై దృష్టిపెట్టాలి. ఇంకా ఉన్నత కోర్సులు చేయాలనుకుంటే, ఎంబీఏ చదవచ్చు. క్యాట్‌, మ్యాట్‌, ఎక్స్‌ఏటీ, తదితర జాతీయ స్థాయి పరీక్షల్లో మంచి స్కోరు సాధించి, పేరున్న సంస్థలో ఎంబీఏ చేయడం మంచిది. బీబీఏ తర్వాత రెండేళ్లు ఏదైనా కంపెనీలో పనిచేసి అనుభవం సాధించాక ఎంబీఏ చేయడం ఇంకా మంచిది. దీనికి నిబద్దత, అంకితభావం అవసరం.

* జీమ్యాట్‌ రాయబోతున్నాను. మనదేశంలోనే మంచి సంస్థలో ఎంబీఏ చేయాలనుకుంటున్నాను. ఇక్కడ జీమ్యాట్‌ స్కోరును పరిగణనలోకి తీసుకునే సంస్థలను సూచించగలరు.
- ఆర్‌. నరేష్‌, గుంటూరు

జీమ్యాట్‌కు మనదేశంలో ఆదరణ పెరుగుతోంది. అనేక ప్రముఖ బిజినెస్‌ స్కూళ్లు జీమ్యాట్‌ను ఎంపిక ప్రక్రియలో పరిగణనలోకి తీసుకుంటున్నాయి. జీమ్యాట్‌ రాసే భారతీయ విద్యార్థుల కోసం ప్రత్యేకంగా www.mba.com/indiaపేరుతో ఓ అధీకృత వెబ్‌సైట్‌ ఉంది. వివిధ అంశాల్లో నాణ్యతా ప్రమాణాల ఆధారంగా బిజినెస్‌ స్కూళ్లను వర్గీకరించి జీమ్యాట్‌ ఇండియా వెబ్‌సైట్‌లో అందుబాటులో ఉంచారు. జీమ్యాట్‌ ఆధారంగా అంతర్జాతీయ స్థాయి బిజినెస్‌ స్కూళ్లలో మేనేజ్‌మెంట్‌ కోర్సులు చేయాలనుకునే విద్యార్థులకు ఈ వెబ్‌సైట్‌ చాలా ఉపయోగపడుతుంది. ఐఎస్‌బీ, ఎక్స్‌ఎల్‌ఆర్‌ఐ, ఐఐఎంలు, అనేక ఇతర ప్రతిష్ఠాత్మక బిజినెస్‌ స్కూళ్లు జీమ్యాట్‌ స్కోరును ఆమోదిస్తున్నాయి. కొన్ని ప్రముఖ సంస్థలు... ఇండియన్‌ స్కూల్‌ ఆఫ్‌ బిజినెస్‌, హైదరాబాద్‌; ఇండియన్‌ ఇనిస్టిట్యూట్స్‌ ఆఫ్‌ మేనేజ్‌మెంట్‌ (ఐఐఎంలు): అహ్మదాబాద్‌, బెంగళూరు, కలకత్తా, ఇండోర్‌, లక్నో; ఎక్స్‌.ఎల్‌.ఆర్‌.ఐ, జంషెడ్‌పూర్‌; టాటా ఇన్ స్టిట్యూట్‌ ఆఫ్‌ సోషల్‌ సైన్సెస్‌, ముంబాయి; ఎస్‌పీ జైన్‌ ఇనిస్టిట్యూట్‌ ఆఫ్‌ మేనేజ్‌మెంట్‌ అండ్‌ రిసెర్చ్‌, ముంబాయి; నార్సీ మోంజీ ఇన్ స్టిట్యూట్‌ ఆఫ్‌ మేనేజ్‌మెంట్‌ స్టడీస్‌, ముంబాయి; ఐఐఎఫ్‌టీ, న్యూఢిల్లీ.

- ప్రొ. ఎం. భాస్కరరావు

బయోటెక్నాలజీలో పరిశోధన చేయాలంటే..?

* నేను ఎం.టెక్‌. (బయోటెక్‌) చేశాను. ప్రస్తుతం అధ్యాపకుడిగా పని చేస్తున్నాను. బయోటెక్నాలజీలో పీహెచ్‌డీ చేయాలంటే ఏ పరీక్షలు రాయాలి?
- కె. ప్రశాంత్‌, కరీంనగర్‌

బయోటెక్నాలజీ, ఇతర సైన్స్‌ సబ్జెక్టుల్లో పీహెచ్‌డీ చేయడానికి జాతీయ స్థాయిలో అనేక ఫెలోషిప్‌ పరీక్షలు, ప్రవేశ పరీక్షలు అందుబాటులో ఉన్నాయి. వాటిలో ప్రధానమైన పరీక్షలు.... సీఎస్‌ఐఆర్‌- యూజీసీ నెట్‌, డీబీటీ - జేఆర్‌ఎఫ్‌, గేట్‌, ఐసీఎంఆర్‌, ఐసీఏఆర్‌ నిర్వహించే పరీక్షలు. వీటిలో ఉత్తీర్ణులవడం ద్వారా జూనియర్‌ రిసెర్చ్‌ ఫెలోషిప్‌ (జేఆర్‌ఎఫ్‌) సాధిస్తే, జాతీయ స్థాయిలో ప్రముఖ సంస్థల్లో తేలిగ్గా పీహెచ్‌డీలో ప్రవేశం లభిస్తుంది. సీఎస్‌ఐఆర్‌, ఇతర ప్రభుత్వ విభాగాల పరిధిలో ఉండే పరిశోధన సంస్థలతోపాటు, కేంద్రీయ విశ్వవిద్యాలయాలు, ప్రముఖ శాస్త్ర విజ్ఞాన సంస్థల్లో పీహెచ్‌డీ చేయవచ్చు.

 చాలా సెంట్రల్‌ యూనివర్సిటీలు పీహెచ్‌డీలో ప్రవేశానికి వేర్వేరుగా ఎంట్రన్స్‌ టెస్ట్‌లను కూడా నిర్వహిస్తున్నాయి. ఈ మార్గంలో కూడా పీహెచ్‌డీలో ప్రవేశం పొందవచ్చు. జేఆర్‌ఎఫ్‌ సాధించిన అభ్యర్థులకు నేరుగా ప్రవేశం లభించే అవకాశం ఉంటుంది. ఒకవేళ జేఆర్‌ఎఫ్‌, నెట్‌ అర్హతలు లేకపోతే ఏదైనా పరిశోధన సంస్థ లేదా యూనివర్సిటీ నిర్వహించే ప్రాజెక్టుల్లో చేరవచ్చు. కొంతకాలం ప్రాజెక్టులో పనిచేసిన అనుభవం సంపాదిస్తే పీహెచ్‌డీ చేసే అవకాశం ఉంటుంది. వివిధ సంస్థల ప్రవేశార్హతలు, నిబంధనలను బట్టి పైన పేర్కొన్న జాతీయ స్థాయి పరీక్షలతో సంబంధం లేకుండా పీజీ అర్హతతో ప్రాజెక్టుల్లో పనిచేయవచ్చు.

 నేను ఇంటర్‌ (ఎంపీసీ) చదివాను. ఫిజిక్స్‌ అంటే బాగా ఇష్టం. ఈ సబ్జెక్టులో ఉన్నత కెరియర్‌కు అవసరమైన కోర్సులు, మంచి సంస్థలను సూచించగలరు.
- ఎస్‌. అవినాష్‌, గుంటూరు

* ఫిజిక్స్‌తో ఇంటర్మీడియట్‌ చదివాక ఉన్నత కోర్సులు చేయడానికి రెండు మార్గాలున్నాయి. అవి... బి.ఎస్‌సి. చేసిన తర్వాత ఐఐటీలు నిర్వహించే జామ్‌ పరీక్ష ద్వారా ఎం.ఎస్‌సి. ఫిజిక్స్‌, తర్వాత పీహెచ్‌డీ చేయడం ఒక మార్గం. ఆంధ్రప్రదేశ్‌లో ఐఐటీ జేఈఈకి ఉన్నంత ప్రాధాన్యం జామ్‌కి లేదు. దీనివల్ల ఐఐటీల్లో ఎం.ఎస్‌సి. కోర్సుల్లో చేరుతున్న ఏపీ విద్యార్థులు చాలా తక్కువే అని చెప్పవచ్చు. ఐఐటీల్లో పీజీ, పీహెచ్‌డీ చేసిన అభ్యర్థులు ఇంజినీరింగ్‌ విద్యార్థుల మాదిరిగానే మంచి కెరియర్‌ను అందుకోవచ్చు.

ఫిజిక్స్‌లో ఉన్నత కెరియర్‌కు మరో మంచి మార్గం... ఇండియన్‌ ఇనిస్టిట్యూట్స్‌ ఆఫ్‌ సైన్స్‌ ఎడ్యుకేషన్‌ అండ్‌ రిసెర్చ్‌ (ఐఐఎస్‌ఈఆర్‌)లలో చేరడం. బేసిక్‌ సైన్సెస్‌లో ఉన్నత స్థాయి పరిశోధనలను ప్రోత్సహించడానికి కేంద్ర శాస్త్ర, సాంకేతిక మంత్రిత్వ శాఖ ఈ సంస్థలను పుణె, మొహాలీ, కోల్‌కతా, భోపాల్‌, తిరువనంతపురంలలో ఏర్పాటుచేసింది.

ఇంటర్మీడియట్‌ పూర్తిచేసిన ప్రతిభావంతులైన విద్యార్థులకు ఈ సంస్థలు బి.ఎస్‌.-ఎం.ఎస్‌. ఇంటెగ్రేటెడ్‌ కోర్సులను అందిస్తున్నాయి. మంచి ఫెలోషిప్‌ కూడా లభిస్తుంది. ఈ సంస్థల్లో ప్రవేశానికి ఇంటర్మీడియట్‌లో సాధారణంగా 90 శాతంపైనే మార్కులు అవసరం. ఐఐటీ-జేఈఈ, కేవీపీవై పరీక్షల్లో మంచి స్కోరు, రాష్ట్ర బోర్డుల నుంచి అత్యుత్తమ ఫలితాలు సాధించిన విద్యార్థులకు ఈ సంస్థల్లో సీట్లు లభించే అవకాశాలు ఎక్కువ.

వీటితోపాటు అనేక యూనివర్సిటీలు, డీమ్డ్‌ యూనివర్సిటీలు ఇంటర్మీడియట్‌ విద్యార్థులకు ఇంటెగ్రేటెడ్‌ కోర్సులను అందిస్తున్నాయి. పరిశోధనల్లో ప్రవేశించాలనుకునే విద్యార్థులకు ఇవి మంచి కోర్సులు. ఇలాంటి సంస్థల్లో ప్రముఖమైనవి... బెనారస్‌ హిందూ యూనివర్సిటీ, వారణాసి; కలకత్తా యూనివర్సిటీ; జాదవ్‌పూర్‌ యూనివర్సిటీ, కోల్‌కతా; సెంట్రల్‌ యూనివర్సిటీ, హైదరాబాద్‌. సంబంధిత సంస్థల వెబ్‌సైట్లలో ప్రవేశ పద్ధతి, పరీక్ష విధానం, ఇతర వివరాలు లభిస్తాయి.

* నేను కర్ణాటకలో ఎం.ఎస్‌సి. (మెడిసినల్‌ కెమిస్ట్రీ) చేస్తున్నాను. తర్వాత అమెరికాలో పీహెచ్‌డీ చేయాలనుకుంటున్నాను. జీఆర్‌ఈ, ఐఈఎల్‌టీఎస్‌ పరీక్షలకు సిద్ధమవుతున్నాను. అమెరికాలో మంచి సంస్థలను సూచించగలరు. ఫెలోషిప్‌లు లభిస్తాయా?
- ఎం. సతీష్‌, బెంగళూరు

సైన్సెస్‌లో ఉన్నత చదువులకు అమెరికాలో అనేక మంచి విద్యాసంస్థలు ఉన్నాయి. వీటిలో పీహెచ్‌డీ చేయాలంటే అత్యంత ముఖ్యమైనవి... మంచి అకడమిక్‌ రికార్డు, జీఆర్‌ఈ స్కోరు. జీఆర్‌ఈలో కనీసం 1200 పైన స్కోరు సాధిస్తే సీటు లభించవచ్చు. కానీ మంచి పేరున్న యూనివర్సిటీలో సీటు రావాలంటే ఇంకా మంచి స్కోరు (1300 పైన) అవసరం. కాబట్టి మీరు పీహెచ్‌డీ ఎక్కడ చేయబోతున్నారనేది చాలావరకు మీరు సాధించే జీఆర్‌ఈ స్కోరును ఆధారపడి ఉంటుంది.

అమెరికాలో ట్యూషన్‌ ఫీజులు, ఫెలోషిప్‌లు, ఇతర మార్గాల్లో ఆర్థిక సహాయం లభించడం అంశాలు యూనివర్సిటీని బట్టి వేర్వేరుగా ఉంటాయి. విద్యార్థి అకడమిక్‌ చరిత్ర, జీఆర్‌ఈ స్కోరు ఇందులో కీలకంగా పనిచేస్తాయి. మెడిసినల్‌ కెమిస్ట్రీలో పరిశోధనలు నిర్వహిస్తోన్న కొన్ని అమెరికన్‌ యూనివర్సిటీలు... ఓహియో స్టేట్‌ యూనివర్సిటీ, లాంగ్‌ ఐలాండ్‌ యూనివర్సిటీ, యూనివర్సిటీ ఆఫ్‌ ఫ్లోరిడా, యూనివర్సిటీ ఆఫ్‌ జార్జియా, సెయింట్‌ జాన్స్‌ యూనివర్సిటీ ఆఫ్‌ న్యూ యార్క్‌, యూనివర్సిటీ ఆఫ్‌ కనెక్టికట్‌, యూనివర్సిటీ ఆఫ్‌ ద సైన్సెస్‌ ఇన్‌ ఫిలడెల్ఫియా, ఫ్లోరిడా ఎ అండ్‌ ఎం యూనివర్సిటీ, టెంపుల్‌ యూనివర్సిటీ.

*  ఎం.ఎస్‌సి. జువాలజీ చదువుతున్నాను. సీఎస్‌ఐఆర్‌ - యూజీసీ నెట్‌ రాయాలనుకుంటున్నాను. ఈ పరీక్ష ఎలా ఉంటుంది? ఏ పుస్తకాలు చదవాలి?
- రాజేష్‌, వరంగల్‌

సీఎస్‌ఐఆర్‌- యూజీసీ నెట్‌లో ఉత్తీర్ణులవడం ద్వారా దేశంలోని ప్రఖ్యాత సంస్థల్లో పరిశోధనలు చేయడానికి అవకాశం లభిస్తుంది. పరిశోధన కాలంలో మంచి ఫెలోషిప్‌ లభిస్తుంది. ప్రభుత్వ నిధులతో కొనసాగే సంస్థల్లో అసిస్టెంట్‌ ప్రొఫెసర్‌ ఉద్యోగాలకు అవసరమైన లెక్చర్‌షిప్‌ అర్హత కూడా దీని ద్వారా లభిస్తుంది. సీఎస్‌ఐఆర్‌ ఆధ్వర్యంలో కొనసాగుతోన్న సంస్థలు, సెంట్రల్‌ యూనివర్సిటీలు, ఇతర ప్రముఖ యూనివర్సిటీలు కూడా ఈ పరీక్ష ఆధారంగా నేరుగా పరిశోధన కోర్సుల్లో ప్రవేశం కల్పిస్తాయి. మీరు లైఫ్‌ సైన్సెస్‌ సబ్జెక్టులో సీఎస్‌ఐఆర్‌ రాయవచ్చు. సీఎస్‌ఐఆర్‌ పరీక్షలో ఒకే పేపర్‌ ఉంటుంది. ప్రశ్నలన్నీ ఆబ్జెక్టివ్‌ మల్టిపుల్‌ చాయిస్‌ పద్ధతిలో ఉంటాయి. ప్రశ్నపత్రం మొత్తం 200 మార్కులకు ఉంటుంది. పరీక్ష వ్యవధి 3 గంటలు.
ప్రశ్నపత్రంలో 3 భాగాలుంటాయి. అవి... పార్ట్‌ ఎ: ఇందులో జనరల్‌ సైన్స్‌, క్వాంటిటేటివ్‌ రీజనింగ్‌ అండ్‌ ఎనాలిసిస్‌, రిసెర్చ్‌ ఆప్టిట్యూడ్‌కు సంబంధించి 20 ప్రశ్నలు ఇస్తారు. ఏవైనా 15 ప్రశ్నలకు సమాధానాలు గుర్తించాలి. పార్ట్‌-బి లో అభ్యర్థి ఎంచుకున్న సబ్జెక్టుకు సంబంధించి 50 ఆబ్జెక్టివ్‌ ప్రశ్నలు అడుగుతారు. ఏవైనా 35 ప్రశ్నలకు సమాధానాలు గుర్తించాలి. పార్ట్‌-సి లో ప్రశ్నలు చాలా లోతుగా, విశ్లేషణాత్మకంగా ఉంటాయి. శాస్త్ర విజ్ఞానానికి సంబంధించి అభ్యర్థి అవగాహనను, భావనల్లో పట్టును, అనువర్తిత జ్ఞానాన్ని పరీక్షించే విధంగా ప్రశ్నలు ఉంటాయి. మొత్తం 75 ప్రశ్నలు ఇస్తారు. ఏవైనా 25 ప్రశ్నలకు సమాధానాలు రాయాలి.

అభ్యర్థులకు సబ్జెక్టులోని ప్రాథమిక భావనలపై బాగా పట్టు ఉండాలి. 8వ తరగతి పాఠ్యాంశాల నుంచి పీజీ వరకు సబ్జెక్టులోని ప్రాథమిక అంశాలను క్షుణ్నంగా చదవాలి. పాఠ్య పుస్తకాలను చదవడంతోపాటు నమూనా ప్రశ్రపత్రాలు, పాత ప్రశ్న పత్రాలను బాగా సాధన చేయాలి.

*  బి.ఫార్మసీ పూర్తిచేశాను. ఎం.ఎస్‌సి. క్లినికల్‌ రిసెర్చ్‌ లేదా ఎం.ఫార్మసీ చేయాలనుకుంటున్నాను. ఈ రెండింటిలో ఏది మంచిది?
- ఎన్‌. రాజ్‌కుమార్‌, హైదరాబాద్‌

మీరు పేర్కొన్న రెండు (ఫార్మా, క్లినికల్‌ రిసెర్చ్‌) కెరియర్‌లకూ అనుకూల, ప్రతికూల అంశాలు ఉన్నాయి. క్లినికల్‌ రిసెర్చ్‌తో పోల్చుకుంటే ఎం.ఫార్మసీ స్థిరంగా ఎదుగుతోంది. ఈ రెండు సబ్జెక్టుల్లోనూ ఉన్నత కోర్సులు చేసినవారికి భవిష్యత్తులో మెరుగైన ఉపాధి అవకాశాలు లభించవచ్చు. క్లినికల్‌ రిసెర్చ్‌కి ఉద్యోగ అవకాశాల పరిధి కొంత పరిమితం. వైద్య రంగం, సంబంధిత విభాగాల్లో పనిచేసే ప్రొఫెషనల్స్‌కు క్లినికల్‌ రిసెర్చ్‌ కోర్సుల వల్ల ఎక్కువగా ప్రయోజనం ఉంటుంది. ప్రత్యేక విభాగాలైన క్లినికల్‌ డేటా మేనేజ్‌మెంట్‌, ఎనాలిసిస్‌లో బాగా ఆసక్తి ఉంటే క్లినికల్‌ రిసెర్చ్‌ వైపు వెళ్లవచ్చు.

మరో ముఖ్యమైన విషయం ఏమిటంటే... వీటిలో ఏ కోర్సు ఎంపిక చేసుకున్నా, విద్యాసంస్థ, కోర్సు నాణ్యత విషయంలో జాగ్రత్తలు తీసుకోవడం మంచిది. సైన్సెస్‌, ప్రొఫెషనల్‌ కోర్సుల్లో ఉద్యోగ అవకాశాలను చాలావరకు కాలేజీ పేరు ప్రతిష్ఠలు ప్రభావితం చేస్తాయి. అధ్యాపక సిబ్బంది, సౌకర్యాలు, ప్లేస్‌మెంట్‌ విషయంలో విద్యాసంస్థ నుంచి సరైన సహకారం, మొదలైన అంశాలను జాగ్రత్తగా పరిశీలించి కాలేజీని ఎంచుకోవాలి. ఫార్మా కోర్సులకు నైపర్‌ (నేషనల్‌ ఇనిస్టిట్యూట్‌ ఆఫ్‌ ఫార్మాస్యూటికల్‌ ఎడ్యుకేషన్‌ అండ్‌ రిసెర్చ్‌) లాంటి పేరున్న సంస్థల్లో సీటు సాధించగలిగితే కెరియర్‌ బాగుంటుంది. ఈ సంస్థకు హైదరాబాద్‌లో కూడా కేంద్రం ఉంది. ఇందులో లభించే కోర్సుల వివరాలు, ప్రవేశ విధానం సంస్థ వెబ్‌సైట్‌లో లభిస్తాయి.

- ప్రొ. యు.ఎస్.ఎన్. మూర్తి.

ఆస్ట్రానమీ కోర్సు చేయాలంటే?

విద్యార్థి పాఠకులు వివిధ కోర్సులకు  సంబంధించి వ్యక్తం చేసిన సందేహాలకు నిపుణుల సమాధానాలు ఇక్కడ  అందిస్తున్నాం.


* నేను బి.ఎస్‌సి. ఇండస్ట్రియల్‌ మైక్రోబయాలజీ చదువుతున్నాను. ఇదే స్పెషలైజేషన్‌తో ఎం.ఎస్‌సి. చేయాలనుకుంటున్నాను. ఎక్కడ అందుబాటులో ఉంది?

- అర్చన, హైదరాబాద్‌

మైక్రోబయాలజీలో ఒక ముఖ్యమైన స్పెషలైజేషన్‌ ఇండస్ట్రియల్‌ మైక్రోబయాలజీ. ఆంధ్రప్రదేశ్‌లో పీజీ స్థాయిలో ఈ స్పెషలైజేషన్‌ను ఏ యూనివర్సిటీలోనూ అందించడం లేదు. పీజీ కోర్సులో భాగంగా ఒక పేపర్‌గా ఈ సబ్జెక్టును చదివే అవకాశం ఉంది. ఇతర రాష్ట్రాల్లో కొన్ని విద్యాసంస్థలు ఈ కోర్సును అందిస్తున్నాయి. అవి... గురు జంభేశ్వర్‌ యూనివర్సిటీ, తమిళనాడులోని అన్నా యూనివర్సిటీ, మధ్యప్రదేశ్‌లోని దేవి అహల్య యూనివర్సిటీ. యూనివర్సిటీ ఆఫ్‌ మద్రాస్‌లో కూడా ఈ కోర్సు అందుబాటులో ఉంది. దీని చిరునామా: యూనివర్సిటీ ఆఫ్‌ మద్రాస్‌, చెన్నై- 600005.

ఇండస్ట్రియల్‌ మైక్రోబయాలజీ స్పెషలైజేషన్‌తో పోస్టు గ్రాడ్యుయేషన్‌ చేసినవారికి ఫార్మాస్యూటికల్‌ కంపెనీలు, ఆహారోత్పత్తుల తయారీ పరిశ్రమల్లో మంచి ఉద్యోగ అవకాశాలుంటాయి. ఇతర కంపెనీల్లో బయోఎథిక్స్‌, టాక్సికాలజీ, వైరాలజీ, ఆగ్రోనమీ, క్వాలిటీ కంట్రోల్‌ టెక్నాలజీ, పబ్లిక్‌ హెల్త్‌, బయోమెడికల్‌ టెక్నాలజీ విభాగాల్లో అవకాశాలు ఉంటాయి. పీజీ పూర్తయ్యాక సీఎస్‌ఐఆర్‌- యూజీసీ నెట్‌ ద్వారా ఫెలోషిప్‌ సాధించి పీహెచ్‌డీ చేస్తే మరిన్ని మంచి అవకాశాలను అందుకోవచ్చు.

*  నేను ఎం.ఎస్‌సి. కెమిస్ట్రీ చేశాను. ఉస్మానియా యూనివర్సిటీలో పీహెచ్‌డీ (కెమిస్ట్రీ) చేయాలనుంది. ఓయూలో పీహెచ్‌డీ కోర్సులకు ప్రవేశం ఎలా లభిస్తుంది?
- కె. నాగరాజు, వరంగల్‌

కెమిస్ట్రీలో మంచి స్పెషలైజేషన్‌తో పీహెచ్‌డీ చేయడం ద్వారా మంచి ఉద్యోగ అవకాశాలను అందుకోవచ్చు. ఉస్మానియా యూనివర్సిటీలో పీహెచ్‌డీ కోర్సులో ప్రవేశానికి రెండు మార్గాలున్నాయి. ఎం.ఎస్‌సి. తర్వాత పీహెచ్‌డీ ఎంట్రన్స్‌ టెస్ట్‌ రాయవచ్చు. లేదా సీఎస్‌ఐఆర్‌ - యూజీసీ నెట్‌/ ఐసీఎంఆర్‌/ డీబీటీ పరీక్షల్లో జేఆర్‌ఎఫ్‌లో ఉత్తీర్ణులవడం ద్వారా ప్రవేశం పొందవచ్చు. సాధారణంగా ఈ అభ్యర్థులను రాత పరీక్ష దశ నుంచి మినహాయిస్తారు. పీజీలో కనీసం 55 శాతం మార్కులు సాధించిన అభ్యర్థులు పీహెచ్‌డీ ప్రవేశ పరీక్ష రాయవచ్చు. మరిన్ని వివరాలు ఉస్మానియా యూనివర్సిటీ వెబ్‌సైట్‌లో లభిస్తాయి.


* ఎం.ఎస్‌సి. బయోకెమిస్ట్రీ చేశాను. ప్రస్తుతం పీజీడీసీఏ చేస్తున్నాను. నాకు ఫార్మా మార్కెటింగ్‌లో ఎలాంటి అవకాశాలు ఉంటాయి?
- శ్రీనివాసరెడ్డి, అనంతపురం

బయాలజీ, కంప్యూటర్స్‌ నేపధ్యం ఉన్న అభ్యర్థులకు మంచి రంగం... బయో ఇన్ఫర్మేటిక్స్‌. మీరు ఇంకా డ్రగ్‌ డిజైన్‌ లాంటి కోర్సులు చేస్తే ఫార్మా రంగంలో మంచి అవకాశాలు లభిస్తాయి. బయో ఇన్ఫర్మేటిక్స్‌, డ్రగ్‌ డిజైన్‌ నిపుణులకు ఉద్యోగ అవకాశాలు కల్పిస్తోన్న కొన్ని ప్రముఖ కంపెనీలు... హెచ్‌హెచ్‌ బయోటెక్నాలజీస్‌, ఆగ్రా; సెల్రిస్‌ ల్యాబ్స్‌, అహ్మదాబాద్‌; స్ట్రాండ్‌ జెనోమిక్స్‌, బెంగళూరు; జెన్‌బయోస్‌, బెంగళూరు; సెంటర్‌ ఫర్‌ బయోఇన్ఫర్మేటిక్స్‌, చెన్నై; బయోమెడ్‌ ఇన్ఫర్మేటిక్స్‌, హైదరాబాద్‌; రిషి బయోటెక్‌, ముంబాయి.

ఫార్మా మార్కెటింగ్‌ రంగం చాలా విస్తృతమైనది. ఫార్మా స్పెషలైజేషన్‌తో మేనేజ్‌మెంట్‌ చేస్తే ఈ రంగంలో అద్భుతమైన అవకాశాలు ఉంటాయి. నైపర్‌ ఈ కోర్సులకు బాగా పేరున్న సంస్థ. అభ్యర్థి సామర్థ్యాలను బట్టి మార్కెటింగ్‌ రంగంలో వేగంగా ఎదగవచ్చు. నైపర్‌ కోర్సుల వివరాలు సంస్థ వెబ్‌సైట్‌లో లభిస్తాయి.


* నేను ఎం.ఎస్‌సి. న్యూట్రిషన్‌ చేయాలనుకుంటున్నాను. మంచి సంస్థలను సూచించగలరు. కోర్సు పూర్తయ్యాక ఎలాంటి ఉద్యోగ అవకాశాలుంటాయి?
- ఆర్‌. స్వర్ణ, విజయవాడ

న్యూట్రిషన్‌లో పీజీ చేయడానికి మనరాష్ట్రంలోనే అనేక ప్రముఖ సంస్థలున్నాయి. వీటిలో అగ్రగామి సంస్థ... నేషనల్‌ ఇనిస్టిట్యూట్‌ ఆఫ్‌ న్యూట్రిషన్‌ (ఎన్‌ఐఎన్‌), హైదరాబాద్‌. ఈ సంస్థ ఎం.ఎస్‌సి. అప్లయిడ్‌ న్యూట్రిషన్‌ కోర్సును అందిస్తోంది. అనేక సంస్థల్లో ఎం.ఎస్‌సి. ఫుడ్‌ అండ్‌ న్యూట్రిషన్‌, ఫుడ్‌ సైన్స్‌, న్యూట్రిషన్‌ అండ్‌ ఫుడ్‌ టెక్నాలజీ తదితర పేర్లతో కోర్సులు అందుబాటులో ఉన్నాయి.


న్యూట్రిషన్‌ సంబంధిత కోర్సులను అందిస్తోన్న మరికొన్ని ముఖ్య సంస్థలు... ఆంధ్ర యూనివర్సిటీ, విశాఖపట్నం (ఎం.ఎస్‌సి. ఫుడ్‌ సైన్స్‌); ఆచార్య ఎన్జీరంగా అగ్రికల్చరల్‌ యూనివర్సిటీ, హైదరాబాద్‌ (ఎం.ఎస్‌సి. ఫుడ్‌ సైన్స్‌); బుందేల్‌ ఖండ్‌ యూనివర్సిటీ, ఝాన్సీ (ఎం.ఎస్‌సి. ఫుడ్‌ సైన్స్‌ అండ్‌ టెక్నాలజీ); సెంట్రల్‌ ఫుడ్‌ టెక్నలాజికల్‌ రిసెర్చ్‌ ఇనిస్టిట్యూట్‌, మైసూర్‌ (ఎం.ఎస్‌సి. ఫుడ్‌ టెక్నాలజీ); చౌదరి చరణ్‌సింగ్‌ యూనివర్సిటీ, మీరట్‌ (ఎం.ఎస్‌సి. ఫుడ్‌ ప్రాసెసింగ్‌ అండ్‌ టెక్నాలజీ); నాగపూర్‌ యూనివర్సిటీ, నాగపూర్‌ (ఎం.ఎ. హోమ్‌ ఎకనమిక్స్‌); తమిళనాడు అగ్రికల్చరల్‌ యూనివర్సిటీ, కోయంబత్తూరు (ఎం.ఎస్‌సి. ఫుడ్‌ సైన్స్‌ అండ్‌ న్యూట్రిషన్‌). వీటిలో ఎన్‌ఐఎన్‌, సీఎఫ్‌టీఆర్‌ఐ అత్యుత్తమ సంస్థలని చెప్పవచ్చు. ఇవి సీఎస్‌ఐఆర్‌, ఐసీఎంఆర్‌ పరిధిలో పనిచేస్తున్నాయి. ఫుడ్‌ సైన్స్‌, సంబంధిత సబ్జెక్టుల్లో ఉన్నత కోర్సులు చేయడానికి ఇవి మంచి సంస్థలు.

* నేను ఇంటర్‌ (ఎంపీసీ) ఫైనలియర్‌ చదువుతున్నాను. ఆస్ట్రానమీ అంటే చాలా ఇష్టం. ఈ రంగంలోకి ప్రవేశించాలంటే ఏ కోర్సులు చేయాలి?

- జి. సాకేత్‌, విశాఖపట్నం

ఇంటర్మీడియట్‌ తర్వాత మీరు బీఈ లేదా బి.ఎస్‌సి. ఇంజినీరింగ్‌ చేయాలి. తర్వాత ఆస్ట్రానమీ సంబంధిత స్పెషలైజేషన్‌తో కోర్సులు చేయవచ్చు. మనదేశంలో ఆస్ట్రానమీ స్పెషలైజేషన్‌తో అండర్‌ గ్రాడ్యుయేట్‌ కోర్సులు అరుదు. మాస్టర్స్‌, పీహెచ్‌డీ స్థాయుల్లో అనేక మార్గాల ద్వారా ఆస్ట్రానమీ సంబంధిత కోర్సులు చేయవచ్చు. ఈ కోర్సులను అందిస్తోన్న ప్రముఖ సంస్థలు... ఇండియన్‌ ఇనిస్టిట్యూట్‌ ఆఫ్‌ ఆస్ట్రోఫిజిక్స్‌, బెంగళూరు; ఇండియన్‌ ఇన్  స్టిట్యూట్‌ ఆఫ్‌ సైన్స్‌, బెంగళూరు; రామన్‌ రిసెర్చ్‌ ఇన్ స్టిట్యూట్‌, బెంగళూరు; ఇంటర్‌ యూనివర్సిటీ సెంటర్‌ ఫర్‌ ఆస్ట్రానమీ అండ్‌ ఆస్ట్రోఫిజిక్స్‌, పుణె.

ఈ సంస్థలు జాతీయ స్థాయి ప్రవేశ పరీక్షల ఆధారంగా ఆయా కోర్సుల్లో ప్రవేశం కల్పిస్తాయి. ఫిజిక్స్‌లో మాస్టర్స్‌ డిగ్రీ చేశాక వీటిలో ప్రవేశించవచ్చు. ఐఐటీ జేఈఈ లేదా జామ్‌ పరీక్షల ద్వారా ఏదైనా ఐఐటీలో ఫిజిక్స్‌ లేదా ఫిజిక్స్‌ డ్యుయల్‌ డిగ్రీ కోర్సులో సీటు సాధిస్తే కెరియర్‌ బాగుంటుంది. ఇంజినీరింగ్‌ గ్రాడ్యుయేట్లు కూడా పైన పేర్కొన్న సంస్థల్లో ఆస్ట్రానమీ సంబంధిత కోర్సులు చేయవచ్చు.

ఈ ప్రశ్నలకు సమాధానాలు ఇచ్చినవారు డా. యు.ఎస్.ఎన్. మూర్తి.