ఆకర్షణీయమైన జీవనశైలి, హోదా, ఉద్యోగభద్రత, జీతభత్యాలూ, సౌకర్యాలతో సాగే ఆర్మ్‌డ్‌ ఫోర్సెస్‌ కెరియర్‌ మరోదానితో పోల్చలేనంతగా ఉన్నతస్థాయిలో నిలుస్తుంది. అందుకే త్రివిధ రక్షణ దళ సర్వీసుల్లో ప్రతి సంవత్సరం పెద్దసంఖ్యలో ఉత్సాహవంతులైన యువతీ యువకులు చేరుతున్నారు. యూపీఎస్‌సీ జాతీయస్థాయిలో నిర్వహించే కంబైన్డ్‌ డిఫెన్స్‌ సర్వీస్‌ పరీక్ష లో రాతపరీక్ష, సర్వీస్‌ సెలక్షన్‌ బోర్డ్‌ (SSB) ఇంటర్వ్యూ భాగం. తాజాగా ప్రకటించిన సీడీఎస్‌ఈ ప్రకటన ప్రకారం మిలిటరీ అకాడమీలో 250 పోస్టులు, నేవల్‌లో 40, ఏర్‌ఫోర్స్‌లో 32 పోస్టులున్నాయి.
ఈ పరీక్షలో విజయానికి అభ్యర్థి వ్యక్తిత్వ స్వభావం, పరిజ్ఞానం, నైపుణ్యం మూడూ ప్రధానమే.
ఇండియన్‌ మిలటరీ అకాడమీ/ఆఫీసర్స్‌ ట్రెయినింగ్‌ అకాడమీల్లో ప్రవేశానికి గుర్తింపు పొందిన డిగ్రీ అవసరం. నేవల్‌, ఏర్‌ఫోర్స్‌ అకాడమీల్లో ప్రవేశానికి బిఎస్‌సీ (ఫిజిక్స్‌-మ్యాథ్స్‌) /బీటెక్‌ అభ్యర్థులు అర్హులు.
ఈ రెండు దశల్లో కలిపి వచ్చిన మార్కుల ఆధారంగా జాతీయ తుది మెరిట్‌ జాబితా తయారవుతుంది. ఇంటర్‌వ్యూలో మార్కులు 50-55 శాతం కంటే మించి రావటం ఏ అభ్యర్థికైనా కష్టం. అందుకని రాతపరీక్షలో తెచ్చుకునే మార్కులే ఎంపికలో కీలక పాత్ర పోషిస్తాయి.
ఎలా సిద్ధం కావాలి?
సీడీఎస్‌సీలో విజయం సాధించటానికి సుదీర్ఘ ప్రిపరేషన్‌, ఏకాగ్రతతో కూడిన సాధన చాలా అవసరం. ఆంగ్లం, సైన్స్‌, గణిత సబ్జెక్టుల్లో అభ్యర్థి నైపుణ్యాలను దీనిలో పరీక్షిస్తారు. గణిత పరిజ్ఞానాన్ని పదో తరగతి స్థాయిలోనూ, మిగిలిన సబ్జెక్టుల అవగాహనను డిగ్రీ స్థాయిలోనూ పరీక్షిస్తారు. రాతపరీక్షలోనూ, ఇంటర్‌వ్యూలోనూ ఇంగ్లిష్‌కు ప్రాధాన్యం కనిపిస్తుంది. అంతమాత్రం చేత గ్రామీణ విద్యార్థుల కంటే పట్టణ అభ్యర్థులకు అదనపు ప్రయోజనం ఏమీ ఉండదు.
మల్టిపుల్‌ చాయిస్‌ ప్రశ్నల్లో నెగిటివ్‌ మార్కులు ఉండటం సరికొత్త ధోరణి. ఇలాంటపుడు కచ్చితంగా తెలిస్తే గానీ సమాధానం గుర్తించటం ప్రమాదం. ఊహాగానాలు చేస్తే అసలుకే ముప్పు వస్తుంది. ప్రతి ప్రశ్నకూ వేగంగా, కచ్చితంగా జవాబు గుర్తించటం అలవాటవ్వాలంటే బాగా అభ్యాసం చేయాల్సిందే.
జనరల్‌ నాలెడ్జ్‌ సిలబస్‌ చాలా విస్తృతంగా ఉండి, అభ్యర్థులను తికమక పెడుతుంది. హిస్టరీ, జాగ్రఫీ, ఇండియన్‌ పాలిటీ, కరంట్‌ అఫైర్స్‌, జనరల్‌ సైన్స్‌ మొదలైన అంశాల సమాహారమిది. ఈ విభాగాల్లో తాజా పరిణామాల సమాచారం కోసం వార్తాపత్రికలూ, మ్యాగజీన్లూ క్రమం తప్పకుండా అనుసరించాలి.
ఇంగ్లిష్‌లో ప్రాథమిక అంశాలను పరీక్షిస్తారు. త్వరగా మర్చిపోయే అవకాశమున్న వ్యాకరణాంశాలను ఉదాహరణలతో సహా అభ్యాసం చేయటం మేలు.
పర్సనాలిటీ టెస్టులో....
దీనిలో వివిధ పరీక్షలుంటాయి.
* సిచ్యువేషన్‌ రియాక్షన్‌ టెస్ట్‌ SRT): 60 వివిధ సందర్భాలను ప్రశ్నలుగా ఇస్తారు. 30 నిమిషాల్లో వీటిని పరిష్కరించాల్సివుంటుంది.
* థిమాటిక్‌ అప్రిసియేషన్‌ టెస్ట్‌ (TAT) :12 బొమ్మల సెట్‌ చూపిస్తారు. 36 నిమిషాల్లో వాటిపై ఆధారపడి కథ అల్లి, రాయాల్సివుంటుంది.
* వర్డ్‌ అసోసియేషన్‌ టెస్ట్‌ (WAT): 60 పదాలు ఇస్తారు. ఒక్కో పదంతో 15 సెకండ్ల వ్యవధిలో వాక్యం తయారుచేయాలి.
* గ్రూప్‌ టెస్ట్‌: 8-10 మంది అభ్యర్థులతో కలిపి ఈ పరీక్ష నిర్వహిస్తారు. గ్రూప్‌ ప్లానింగ్‌, బృంద చర్చ, డిబేట్లు, ఔట్‌డోర్‌ గ్రూప్‌ టాస్కులు ఉంటాయి.
* శారీరక ప్రమాణాలు: అభ్యర్థుల శారీరక ప్రమాణాలను ఎస్‌ఎస్‌బీ వైద్యాధికారులు పరీక్షిస్తారు.
దరఖాస్తు ఇలా
సీడీఎస్‌ఈ దరఖాస్తులను ప్రధాన తపాలాకార్యాలయాల్లో రూ.20 చెల్లించి పొందవచ్చు. భర్తీ చేసినవాటిని పంపుకోవటానికి నవంబరు 28 వరకూ గడువు ఉంది. పూర్తి వివరాలకు 'ఎంప్లాయిమెంట్‌ న్యూస్‌' 29 అక్టోబరు- 4 నవంబరు సంచిక చూడవచ్చు.
* పరీక్ష తేదీ: ఫిబ్రవరి 12, 2012
* యూపీఎస్‌సీ వెబ్‌సైట్‌: www.upsc.gov.in
* ఆన్‌లైన్‌లో దరఖాస్తు చేయటానికి: www.upsconline.nic.in
No comments:
Post a Comment