ఫార్మసీ కోర్సుల ప్రత్యేకతలు తెలుసా?

ఇవాళ ఈనాడులో ఫార్మా-డి కౌన్సెలింగ్ గురించి ఓ వార్త వచ్చింది చూశారా?  ఇక్కడ ఇస్తున్నాం.

ఫార్మా డీ కౌన్సెలింగ్‌ ఉన్నట్లా.. లేనట్లా?

హైదరాబాద్‌, న్యూస్‌టుడే: ఫార్మా డీ కౌన్సెలింగ్‌ ఈసారి ఉంటుందా? ఉండదా? ఇదే ప్రశ్న ఇపుడు విద్యార్థులను వేధిస్తోంది. ఈ నెల 5న ఇంజినీరింగ్‌ తుది కౌన్సెలింగ్‌ నిర్వహిస్తామంటూ ఉన్నత విద్యాశాఖ ఒక ప్రకటన జారీ చేసింది కానీ... ఫార్మా డీ గురించి ప్రస్తావించలేదు.

దీంతో ఫార్మా డీ కౌన్సెలింగ్‌పై అనుమానాలు వ్యక్తమవుతున్నాయి.

ఆరేళ్ల కాలపరిమితి కలిగిన ఈ కొత్త కోర్సుకు ఇటీవల కాలంలో డిమాండు పెరగడంతో కౌన్సెలింగ్‌ తేదీల కోసం విద్యార్థులు ఎదురుచూస్తున్నారు. బీఫార్మసీ, బయోటెక్నాలజీలో ప్రవేశాలకు సంబంధించిన కౌన్సెలింగ్‌ ప్రక్రియ ఈ నెల 6 నుంచి 11వ తేదీ వరకు జరగనుంది. 12వ తేదీన సీట్ల కేటాయింపు జరుగుతుంది. ఫార్మా డీ ప్రవేశాల గురించి ప్రత్యేకంగా ప్రకటన రాకపోవడాన్ని చూస్తే... కౌన్సెలింగ్‌ ఉండకపోవచ్చనే భావిస్తున్నారు. ఎంతో డిమాండు ఉన్న ఫార్మా డీలో ప్రవేశాలను నేరుగా చేసుకుంటామంటూ ప్రైవేటు కళాశాలల యాజమాన్యాలు ప్రభుత్వం ఒత్తిడి తెస్తున్నాయని, దీనిలో భాగంగానే తెరవెనుక ప్రయత్నాలు జరుగుతున్నాయని విద్యార్థులు ఆందోళన వ్యక్తం చేస్తున్నారు.

ఫార్మా డీ కోర్సును 32 కళాశాలలు నిర్వహిస్తున్నాయి. ఒక్కో కళాశాలలో 30 చొప్పున సీట్లు ఉన్నాయి. ఇందులో 21 సీట్లను కన్వీనర్‌ కోటాతో భర్తీచేయాలి. మిగిలిన సీట్లను యాజమాన్యాలు భర్తీ చేసుకుంటాయి. కన్వీనర్‌ కోటా రూ.68,000 కాగా, యాజమాన్య కోటా రూ.1,55,000 చెల్లించాలి. ఈ కోర్సుకున్న డిమాండు దృష్ట్యా కొన్ని కళాశాలల్లో డొనేషన్ల పర్వం సాగుతోంది. కన్వీనర్‌ కోటా ద్వారా సీట్ల భర్తీ జరిగితే అర్హులైన విద్యార్థులకు న్యాయం జరుగుతుంది. బోధనా ఫీజుల చెల్లింపు పథకం ద్వారా విద్యార్థులు ప్రయోజనం పొందుతారు.

ఢిల్లీలో కుదరని సమన్వయం: 
ఇంజినీరింగ్‌ కళాశాలలకు కాస్త ఆలస్యమైనా అఖిల భారత సాంకేతిక విద్యా మండలి నుంచి అనుమతులన్నీ వచ్చాయి. కౌన్సెలింగ్‌ ప్రారంభమయ్యే నాటికి వాటి వివరాలు వెబ్‌సైట్‌లో ఉంచారు. విద్యార్థులు ఆప్షన్లు నమోదు చేసుకున్నారు. బీఫార్మసీ, బయోటెక్నాలజీ కోర్సుల అనుమతులు కూడా అఖిల భారత సాంకేతిక విద్యా మండలే ఇస్తోంది. ఫార్మా డీ కోర్సుని మాత్రం భారత ఫార్మసీ మండలి చూస్తోంది. ఈ రెండు శాఖల మధ్య సమన్వయం కొరవడటం వల్ల కూడా సమస్య ఏర్పడినట్లు తెలుస్తోంది. బీఫార్మసీలో ఒక్కో కళాశాలలో 60 సీట్లు మాత్రమే ఉండాలని ఫార్మసీ మండలి పేర్కొంటుండగా ఎఐసీఈటీ 120, 180 సీట్ల భర్తీ వరకు ఆమోదిస్తోంది. ఫార్మసీ మండలి నుంచి ఫార్మా డీి కోర్సులకు సంబంధించిన అనుమతులు ఇంకా వస్తున్నాయని, త్వరలోనే ఈ సమస్య పరిష్కారమవుతుందని ఉన్నత విద్యామండలి ఇన్‌ఛార్జి కార్యదర్శి డాక్టర్‌ రాజశేఖర్‌రెడ్డి ఆశాభావం వ్యక్తం చేశారు.

ఇంత ప్రాధాన్యముంది కదా, మరి  ఫార్మసీ కోర్సు ప్రత్యేకతలు ఏమిటి?

‘చదువు’ ప్రచురించిన ఈ కథనం చదివి, తెలుసుకోండి!

రచయిత ఫార్మసీ రంగ నిపుణుడు  ఎం. వెంకటరెడ్డి.